Takk fyrir okkur

Takk kærlega fyrir okkur. Öll jólakortin og pakkana. Þið kannski sjáið það á myndunum hvað sérstaklega börnin voru glöð með allt.

Í dag fórum við í göngutúr í Frederiksberg Have og börnin voru dugleg að ganga sjálf. Við fórum að gefa öndunum. Þegar við vorum búin að taka brauðið og börnin úr kerrunni var hún orðin svo létt að hún rann beint útí síkið. Ekki geðslegt. Þarna var líka hægt að fara á skauta og voru margir á skautum. Hægt að leigja á 40 dkr. á tímann.

Okkur leiðist líka greinilega mikið og lengir eftir heimsókn því við vorum öll svo viss um að þau væru að koma í dag, mamma, pabbi, Unnur og Burkni að öll plönin í dag miðuðust við það og ekkert verið að skoða það neitt frekar. Enn einn dagurinn bíður því okkar. Hvað ættum við að gera á morgun? Hmmm...Eiginlega alltof margir möguleikar.


Kveðjur,
Auður, Eiríkur, Sigga Halla og Björn Orri.

Aðfangadagsköld myndir

Myndir frá Aðfangadegi hér í Danmörku.

Jólakveðjur frá Danmörku

Jólaundirbúningurinn á fullu

Allt á fullu hérna eins og á flestum öðrum stöðum, geri ég ráð fyrir. Taka til, þvo þvott, hugsa um börnin, ganga frá þvotti, kaupa jólamatinn, leika við börnin, skrifa jólakveðjur, þurrka af, þvo gólf, kaupa síðustu jólagjafirnar og margt fleira.

Guðmundur kemur eftir nokkra tíma, kl. 16. Björn Orri var í fríi í dag á leikskólanum og Sigga var á jólahátíð í sínum skóla.

Á aðfangadag stillum við svo allar klukkur uppá nýtt á íslenskan tíma og hlustum á rúv á netinu. Við borðum andabringur með appelsínusósu og gómsætu grænmeti a la Eiki. Við keyptum danskt greni sem ég vona að haldi barri. Það bíður úti eftir að komast inn og verða skreytt á Þorlák en annars er orðið jólalegt hjá okkur. Í desembermánuði hef ég komist yfir það að baka nokkrar tegundir af smákökum og meira segja lögðum við Eva í að baka Sörur sem heppnuðust mjög vel. Á jóladag ætlum við svo að fara í íslenska jólamessu og fá okkur svo hangikjöt þegar við komum heim. Annan í jólum ætlum við svo að fara á jólaball hér á kollegiinu. Svo koma foreldrarnir og systir og Burkni 27. des. og ætlum við að reyna að halda uppá áramótin saman.

Hér er snjólaust og búið að spá því svo sem lengi en ljósin skreyta mörg hús hér og mörg skreytt jólatré úti. Einnig eru verslunargöturnar vel skreyttar svipað og Laugavegurinn og Strikið slær allt út með ljósaflóði. Sem sagt 100% líkur á rauðum jólum.

Engin jólakort voru skrifuð hér á bæ en því verður reddað öðruvísi.

Jólakveðjur,
Glaðsaxarnir.

Sæl öll
Nú er það skóladrengurinn sem bloggar. Er að horfa á tónleika með Elvis Presley í sjónvarpinu. Ég hef aldrei séð tónleikaupptöku með honum áður og vissi ekki að hann var svona mikill húmoristi. Er bara að átta mig á því núna hvað hann var mikill snillingur. Skil núna afhverju hann var svona djöfull vinsæll. Hann hafði "ÞAÐ" eins og það er orðað. Þegar hann byrjaði á laginu "In the Gettho" fékk ég svona vellíðunar gæsahúð eins og ég fæ alltaf þegar ég heyri góð lög í góðum flutningi. Þegar ég sá hann flytja þetta varð ég fullviss um að þetta er eitt af bestu lögum allra tíma. Í framhaldi af því fór ég að hugsa hvað eru bestu lög allra tíma. Niðurstaðan er eftirfarandi.

1. One - U2
2. Billy Jean - Michale Jackson (ég helda það séu allir sammála um að þetta er yfirnáttúrleg snilld)
3. In the Gettho - Elvis Presley
4. Everlong - Foo Fighters
5. Öxnardalsheiði - S.H. Draumur (Gunnar Hjálmarsson)
6. Everything Counts - Depeche Mode
7. Your Song - Evan McGregor úr myndinni Rauða Millan (Elton Jhon)
8. Never Going Back Again - Fleetwood Mac
9. Man on the Moon - R.E.M
10. Get ekki gert upp ámilli nokkurra laga með Mannakorni, Bubba og Bítlunm , U2 og nokkrum fleirum.

Ég geri mér gein fyrir því að auðvitað eru örfáir þarn úti sem eru kanski ekki sammála um eitt eða tvö lög á þessum lista en ég held að það sé alvega hægt að segja að þetta er nálægt því að vera staðreind. Hvað finnst þér?

Í lokin vil ég þakka fyrir alla jólapakkana sem ég hef fengið senda frá Íslandi. Ég hef reyndar tekið eftir því að það hefur enginn sent mér ævisöguna hans Guðna Ágústssonar ennþá og þið sem hafið sent mér mjúka pakka getið enn bætt ráð ykkar, það eru jú enn þrjár vikur til jóla (common, ég hef yfir 30 ára reynslu í pakkaþukli og ég get líka lesið hver sendi mér hvaða pakka).

Ég vil minna á fjölbreytta dagskrá á þessum vef í desember. M.a. hljóðrituð jólakveðju frá okkur hér á Kagså og bein útsending frá borðhaldinu á aðfangadagskvöld.

Kv Eiríkur

Afmælisfest

Afmæli Siggu Höllu

Í dag á hún afmæli stelpan mín. Loksins er stundin komin sem hún hefur talið niður til lengi, lengi. Ljós punktur í útlandinu. Við byrjuðum daginn eins og vanalega á afmælum að vekja afmælisbarnið með köku með kertum og afmælissöng. Svo settumst við öll við borðið og gæddum okkur á súkkulaði og heitu kakói. Sigga fékk að opna afmælispakka frá okkur. Hún veit ekki að það komu nokkrir pakkar frá Íslandi. Ég ætlaði að koma henni á óvart eftir skóla. Kærar þakkir fyrir hennar hönd fyrir að hugsa fallega til hennar. Þetta gleður hana mikið og verður svona minna sjokk fyrir hana svona stórfjölskyldulausa hér úti. Afi hennar er nú samt í heimsókn þannig að það reynir mikið á hann að vera fulltrúi ykkar allra. Sem betur fer vegna þess að pabbi hennar er horfinn af heimilinu. Verkefnaskil í vikunni. Seinna í dag verður julehygge með bekknum hennar Siggu þar sem verður sungið og borðað jólaguffelse. Planið er að fara svo eftir það á julefrokost hér á kro í hverfinu. Sigga er svo búin að bjóða nokkrum (7) krökkum á laugardaginn til sín. Þremur stúlkum sem hún leikur mest við í bekknum, þremur stúlkum sem hún leikur mest við frá kollegiet og einum dreng úr bekknum sem hún leikur við. Við reynum að setja myndir inn fljótlega. Have en god dag! Hej.

Arnar og Harpa til hamingju með daginn í gær. Hugsaði mikið til ykkar.

KH
Auður.

Fórum óvænt til Svíþjóðar

Já, við skelltum okkur til Sverige á sunnudaginn var. Gott götuleiðbeiningakerfi kom að góðum notum. Takk Örn. Ýmislegt fleira hefur verið fest á mynd og er frumsýnt hérmeð.

Óli og fjölskylda tóku vel á móti okkur og nutum við dagsins að hluta úti sem var sólríkur en heldur kaldur. Takk fyrir daginn Óli og Bía.

Krakkarnir kynntust nýrri venju að ganga í hús og snýkja nammi og klæddu sig bæði upp við það tilefni. Björn Orri vildi ekki vera minni maður en systir sín.

Sigga fékk fyrstu vinkonu í heimsókn úr bekknum. Við notuðum tækifærið að láta hana hjálpa okkur að baka súkkulaðimúffur fyrir skólann. Bekkjasystkinin hafa skiptst á að koma með góðgæti á föstudögum og nú var komið að Siggu. Þetta gekk allt saman mjög vel og engin samskiptavandamál komu upp.

Sigga fór á fyrsta diskótekið sitt í kvöld. Mikið stuð. Foreldrarnir máttu alls ekki koma með inn og var dyravörður settur í það að passa uppá umhyggjusömu foreldrana og ekki síðst forvitnu. Þeir stóðu því flestir fyrir utan að reyna að sjá krakkana í gegnum gluggana fyrstu mínúturnar. Sigga var uppábúin og vinkonur hennar líka. Hún er búin að vera slöpp í maganum í vikunni og versnaði það í kvöld af einhverjum ástæðum. Þannig að hún hringdi heim þegar diskóið var hálfnað og fékk okkur til að sækja sig. Fleiri lítil hjörtu biðu eftir að vera sótt snemma af ýmsum ástæðum, m.a. að tónlistin var hávær. Endaði þannig að Elín vildi líka heim og fór hún heim með Siggu. En þær skemmtu sér ágætlega og vita núna hvað er að fara á diskó eins og mamma og pabbi fara stundum á, he, he.

Látum okkur sjá. Kannski að gleyma einhverju en myndirnar tala þá sínu máli, ekki satt? Kíkið bara: http://picasaweb.google.com/audurbj/DiskHrekkjavakaSvJOgFleiraSkemmtilegt

Munnræpa

Ætli sé ekki best að halda uppá netleysið með munnræpu hér. Ekki margir aðrir sem vilja taka við henni. Við erum byrjuð að hugsa til jólanna hér. Búðirnar að fyllast af jólavarningi eftir haustfríið og svo erum við farin að hlakka til gestagangsins þá. Fyrst heimsækja okkur samt Hallur og Steinunn og síðast en ekki síst hún Áróra sem Sigga hlakkar mikið til að hitta. Þau ætla að vera hér þarnæstu helgi. Áróra reyndar styttra þar sem hún er að koma frá Íslandi alein ekkert smá dugleg. Svo fer að líða að afmæli Siggu eða reyndar þeirra beggja frænkna og þá verður afi Björn hjá okkur. Held hann komi klyfjaður íslensku gúmmilaði fyrir jólin. Guðmundur frændi/bróðir kemur svo 21. des. og verður til 6. jan. og restin af liðinu (Unnur OG Burkni og amma Sigrún og afi Björn (aftur)) kemur 27. des-6.jan.

Ég skrapp í stóran jólaundirbúningsverslunarleiðangur sem var bara frekar árangursríkur. Hitti á útsölur í barnafataverslunum og skoðaði úrvalið svo auðveldara verði að koma með börnin að máta seinna meir, jólaföt og -skó. Fór í Lyngby Storcenter. Algjört völundarhús þarna inni en þar eru H&M, Zara, Exit og fleiri minna eða meira þekkt merki. Ég rakst þar á risaskóverslun þar sem verðið var bara mjög sanngjarnt. Saknaði Unnar þar sem verslunarfélaga. Förum þangað saman seinna.

Börnin eru búin að ganga í gegnum aðlögunartímabil þar sem allt er ómögulegt en þau virðast vera að ná sér núna. Þau taka þetta út á mjög ólíkan máta. Foreldrarnir eru líka búnir að þurfa að bíta á jaxlinn því auðvitað er þetta erfitt fyrir þau líka stundum. Björn Orri er búinn að vera meira og minna alveg ómögulegur alveg síðan rétt áður en við fluttum út. Hann virðist vera að taka eitthvað þroskakast í sambland. Rólega barnið mitt er semsagt ekki lengur rólegt. Hann þarf að reyna á foreldrana hvað hann getur gengið langt með eigið sjálfstæði og getur það gengið ansi nærri þeim stundum. Við erum líka svolítið ringluð af því við vitum ekkert hvernig á að taka á þessu. Kunnum ekkert á svona. Eitt erfiðasta er samt að hann hefur ekki viljað fara að sofa síðan hann fékk nýja kojurúmið. Hann var svo auðveldur áður hvað það varðaði og lagðist bara og sönglaði sig í svefn. Núna er frelsið líklega að trufla hann og hann helst ekki í rúminu og virðist ekkert þreyttur. Ég stytti reyndar svefninn hans á leikskólanum niður í 1 klukkutíma og það er að bera árangur núna og hann virðist rólegri og ánægðari. Hann er mjög ánægður á leikskólanum og nýtur sín vel. Smá mont líka að Björn Orri hefur ekki verið duglegur að setjast á kopp eða klósett og sé ég framá að þetta taki lengri tíma en hjá Siggu en hann kúkaði (afsakið) í klósettið um daginn og það var mikil hamingjustund og honum mikið hrósað fyrir. Ekki hefur borið á áhuga á klósettinu síðan.
Sigga hefur verið að berjast við tungumálið og málleysið en það er allt að koma núna. Einnig reynir á að vera stóra systir núna og berjast þau um athygli foreldra á hvorn sinn hátt. Ólátabelgurinn vinnur samt of oft með neikvæðri athygli því miður og það fer fyrir brjóstið á þeirri eldri. Hún á reyndar ekki nógu marga félaga ennþá. Hún er svo félagslynd. Hún leikur samt mest við hana Stine í skólanum og Andreu nágranna og stundum hana Elínu nágranna. Þetta tekur bara tíma og hún hefur gott af því líka að róa sig niður og leika svolítið ein eða með okkur. Hún er enn að kvarta yfir að búa ekki á Íslandi. Hana langar að hitta bestu vini sína og saknar þeirra allra. Hugsar mikið um þá. Hún æfir sig mikið að skrifa og teikna heima og skrifar oft og mörgum sinnum nöfnin á nokkrum vinum sínum, t.d. Lovísu, Sigga Val og Mörthu Clöru. Hún hefur líka verið að æfa sig að lesa og er bara orðin nokkuð góð að stauta sig áfram og að skrifa orð sem hún þekkir eftir því hvernig þau hljóma. Hún lærir þetta ekki í skólanum, ekki enn. Þetta kemur hún til með að læra allt öðruvísi líka á dönsku. Við erum mjög ánægð með þennan áhuga hennar á lestri og hrósum henni mikið fyrir árangurinn. Veit samt ekki hvort hún sé þá að læra eftir rangri aðferð? Verð að spyrja kennarana í fjölskyldunni. Veit ekki hvað hún lærir mikið í stærðfræði því erfitt að fá uppúr henni hvað hún gerir nákvæmlega í skólanum og hefur ekki enn fengið námsbækurnar með heim. Hún hefur samt verið að æfa sig hér heima og virðist vera farin að skilja einfalda samlagningu og frádrátt ágætlega. Hún hefur þá aðallega verið að leysa verkefni í Geitungnum. Hún var reyndar byrjuð á því síðasta vetur þegar áhuga á að skrifa og læra stafi vaknaði.

Á eftir ætlum við að mála okkur í framan og fara í hlutverk einhverra vætta og ráfa um nágrennið og leita að einhverju skemmtilegu. Við erum bara rétt að uppgötva Halloween og erum svolítið sein í þessu öllu saman. Við föttuðum ekki að kaupa grasker nógu snemma til dæmis en Sigga er að fá áhuga og því höfum við ákveðið að gera eitthvað aðeins úr þessu. Held reyndar að ekki sé sterk hefð fyrir Halloween hér. Verðum betur undirbúin á næsta ári.

Næstu helgi er Kagsaafest, hátíð þar sem nýjir Íslendingar eru boðnir velkomnir á kollegíið. Við borðum góðan mat saman í sal hér á svæðinu og er Eiríkur í matarnefndinni. Dagskrá verður fyrir börnin og skemmtiatriði fyrir fullorðna fólkið.

Nóg af þessu blaðri. Bið að heilsa ykkur.

Auður.

Nýjar myndir

Sigga tók mjög margar af myndunum. Hún er að æfa sig og vonandi verður hún góður ljósmyndari seinna meir. Við höfum gleymt myndavélinni svolítið oft og því er svolítið magn af myndum á símunum okkar líka. Þær bíða betri tíma.

http://picasaweb.google.com/audurbj/DanmRkSeptOgOkt2007

Góða helgi.

Sigga flaug í gegn um foreldraviðtalið með stæl!

Ég sat rétt áðan með Siggu í foreldraviðtali og hún skildi hvert einasta orð sem sagt var. Ég er svo stolt af henni. Eftir viðtalið þar sem kom fram að allt gengi vel hjá henni skýrði hún það út fyrir mér að hún hefði allt í einu byrjað að skilja dönskuna. Amma hennar á himnum hefði kannski galdrað skilninginn til hennar. Hún skildi fyrst ekki neitt og svo allt í einu skildi hún allt. Voða skrítið. Nú er hún hamingjusamari í skólanum. Hún er dugleg að bjarga sér ef hana vantar orð þá bendir hún bara og notar líkamann mikið. Svo hefur komið sér vel að eiga einn íslenskan vin sem talar bæði tungumálin. Sigga er búin að vera með skólanum í sveitinni alla vikuna að skoða dýrin og veiða fisk í net. Hún hafði gaman af því. Enn er hún á milli mála þannig að hún á erfitt með að segja frá öllu sem er að gerast í skólanum á íslensku því hún veit bara hvað var að gerast á dönsku. Ég reyni samt að fiska þetta uppúr henni.
Í kvöld fer ég svo á foreldrafund hjá leikskólanum hans Björns Orra. Þar verður kynning á starfseminni og kosið í foreldraráð.

Kærlig hilsen,
Auður.

Efteraarsferien

Við erum búin að hafa það mjög gott í haustfríinu okkar. Mikil dagskrá hjá okkur. Byrjuðum á því að fara á menningarnótt í Kaupmannahöfn. Þurftum að kaupa passa til að komast frítt í lest og strætó og inn á atburðina, kr. 75 pr. fullorðinn mann. Öll söfn voru opin og opinberar byggingar líka. Ýmislegt að gerast. Við komum meðal annars við í grænlenska húsinu sem var mjög gaman. Þar söng grænlenskur kór í öllum sínum skrúða. Annars nutum við þess að ganga um og njóta stemmningarinnar. Á laugardeginum slöppuðum við af hér heima. Á sunnudeginum fórum við í bíltúr í yndislegu veðri á nýja bílnum okkar til Roskilde þar sem við gengum aðeins um við höfnina og skoðuðum víkingaskip en keyrðum svo áfram upp eftir Roskildefjord og við stoppuðum í Frederikssund. Ætluðum að finna fjöru eða strönd og skóg á leiðinni en gekk ekki vel. Í Frederikssund bjuggum við vinkonurnar sællar minningar í viku eða svo, 18 ára og brölluðum margt margt saman. Við fjölskyldan litum á höfnina, fórum í boltaleik þar sem endaði með því að boltinn fór í sjóinn en hann bjargaðist í land eftir nokkrar tilraunir. Eftir það fókusuðum við á að finna skóg. Erfitt að finna hreina náttúru hér. Allt svo skipulagt og þétt byggt. Við sáum til dæmis skóg á einum stað en fundum engan inngang, allt afgirt. Við urðum frá að hverfa og fundum annan með leiktækjum og allt. Vorum mjög sátt eftir daginn. Á mánudeginum fórum við í lítinn bæ kallaðan Dragör og er úti á Amager. Hluti bæjarins eru gömul hús við litlar götur. Bærinn stendur við litla höfn og á sumrin er hægt að fara í sjósund og horfa á Eyrarsundsbrúnna. Nokkrar sætar sérbúðir þarna og sáum líka lítið sætt bíó með flottum bíómiðum. Enduðum þennan dag svo í Ikea þar sem við keyptum nokkra hluti sem okkur vantaði til að betrumbæta heimilið eins og til dæmis hillur. Í dag fórum við í BonBonland. Þar erum við að tala um stóran skemmtigarð með fullt af tækjum fyrir fullorðna og börn. Við höfðum öll gaman að þessu. Fyrir leiktækjaóða þá eru þarna tveir frábærir rússibanar. Annar fer lóðrétt upp og dettur svo lóðrétt niður en samt aðeins til baka undir sig og hinn snýst allan tímann og fer samt í hringi. Brjálað. Þarna eru líka fallturnar. Við keyptum okkur bara inn og fórum í það sem okkur langaði ekkert túrband eða miðar eða annað vesen. Mjög gaman. Á morgun fer Björn Orri á leikskólann og Sigga kemur með mér í vinnuna. Eiríkur ætlar að læra. Um helgina ætlum við að fara á árshátíð með Lýsi hér í Kaupmannahöfn. Kannski reynum við að finna skemmtilega sundlaug líka fyrir krakkana.

KH
Glaðsaxarnir.

Óska listinn fyrir jólin.

Sæl öll. Ég geri ráð fyrir að þið séuð farin að huga að jólagjöfun til að senda út til okkar nú þegar. Við erum allavegana farin að hugsa um ykkur heima á fróni. Það er betra að vera tilbúinn með pakkana snemma þegar þarf að senda á milli landa. Til að auðvelda ykkur þetta þá vil ég senda ykkur óskalistann minn.


1. Ævisaga Guðna Ágústssonar

2. Ævisaga Steingríms Hermannssonar (2. bindi. Ég á 1. bindi)

3. Ævisaga Steingríms Hermannssonar (3. bindi)

4. Ef þið náið ekki í Guðna eða Steingrím áður en þær seljast upp, sem mér finnst mjög líklegt að gerist núna fyrir jólin þá vil ég fá einhverja af ljóðbókum Sigmundar Ernis (Höfundur ævisögu Guðna).

5. Ef Sigmundur er líka uppseldur þá vil ég fá stefnuræðu Halldórs Ásgrímssonar frá flokksþingi Framsóknarflokksins 2002.

Ef hún er ekki til þá er ég bara mjög sáttur við jólakort frá ykkur.


P.s. Auður er að vinna í listanum sínum og barnanna.

Kveðja EK

Bilenyheder, flödeboller og mange andre forskellige ting

Fórum í misheppnaða bæjarferð í dag og komum köld og vot heim. Ætluðum að skreppa og kíkja á bílinn okkar í dagsljósi og gerðum það. Þá vorum við komin niður í bæ og ákváðum að halda okkur þar en höfðum ætlað í einhverja verslunarmiðstöð og skipta liði og reyna að finna einhverjar afmælisgjafir. En viti menn rigningin jókst og jókst og við gerðum ekkert nema að vökna meir og meir. Börnin voru reyndar vel sett í kerrunni góðu (stóru lokuðu hjólakerrunni). Ferðin byrjaði reyndar þannig að kvenkyns strætóbílstjóri lokaði á okkur vegna þess að hún hélt því fram að ekki væri leyfilegt að fara með kerruna í strætó. Við urðum því að sitja og bíða eftir næsta sem kom eftir tíu mínútur. Konan sem er að selja bílinn á íslenskan kærasta frá Hafnarfirði. Skemmtileg tilviljun. Þegar heim var komið fengum við okkur heitt heimalagað kakó og vínarbrauð. Við erum að elda kjúlla í ofni með einhverri sósu sem Eiríkur galdrar fram. Svo stór kjúklingur að við höfum hann í afgang á morgun. Við ætlum að baka köku á morgun en svo ætlum við að elda eitthvað sérlega gott á mánudaginn og hafa smáfjölskylduafmæli.
Framundan er líka haustfrí í skólunum, 13.-22. okt. Við gerum ráð fyrir að vera komin á bíl þá og taka svona tvo heila daga í dagsferðir. Ekki ákveðið enn hvað á að gera. Eiríkur ætlar að reyna að nota fríið líka í að vera duglegur að læra. Rosalega mikið að gera í skólanum hans og ég er afskaplega fegin að vera bara í hlutastarfi.
Allavega höfum við afrekað það núna að vera hér í tvo heila mánuði og auðvitað erum við líka að halda uppá það með afmælunum.
Bílafréttirnar eru þær að við erum að bíða eftir pappírum frá tryggingafélaginu og þá þurfum við að fara til þeirra og semja og fá plagg um að við ætlum að tryggja hjá þeim. Þá fyrst getum við gengið frá bílakaupum. Sem sagt gerist í vikunni og verður vonandi búið á föstudaginn þetta vesen.
Sigga fékk flödeboller í skólanum um daginn. Ákveðið var að á hverjum föstudegi ætli börnin að hygge sig og fá sér eitthvað gott. Við foreldrarnir eigum að skiptast á að koma með eitthvað gott. Síðast var súkkulaðikaka. Ég er að gæla við að koma með pönnukökur með sykri. En ekki fyrr en 2. nóvember.
Við Eiríkur erum komin í nefnd fyrir Kagsaafest sem verður haldin 3. nóvember. Ætti ekki að koma á óvart að við erum í matarnefnd. Þetta er svona árshátíð Kagsaabúa en eingöngu fyrir Íslendingana hér. Í fyrra mættu um 80 en veit ekki enn hvað margir búa hér. Allavega er íslenska algengasta tungumálið.

K.H.

Kaupmannahafnarlífið

Við vorum svo harðákveðin í því að vera án bíls að bíllinn okkar gaf upp öndina áður en við fluttum út. Nú erum við komin á aðra skoðun. Auðvitað skiptir svolitlu máli staðsetning íbúðar og það er einmitt málið. Okkar íbúð eða hús er ekki vel staðsett miðað við strætó- og lestarsamgöngur. Of mikið vesen ef við erum að kaupa inn og kaupa stóra hluti. Svo gefur bíll okkur líka frelsið að geta farið útúr borginni á stuttum tíma. Þannig að núna eyðum við kvöldunum á netinu að skoða bíla. Eiríkur fer í kvöld að skoða einn sem okkur leist vel á.
Mér finnst þetta hálfleiðinlegt því ég var svo ánægð með minn umhverfisvæna lífsstíl sem ég aðhyllist meira og meira en þá bara skiptum við bílnum seinna uppí umhverfisvænni bíl.
Talandi um umhverfisvænt þá er auðvelt að lifa umhverfisvænt hér. Mikið um vistvænar og lífrænar vörur og oft ekki mikið dýrari, jafnvel sama verð oft og á óvistvænu eða ólífrænu. Borgarbúar hafa fyrir löngu aðhyllst þennan lífsstíl og nú dreifist hann út um landið.
Ef þeir þétta Metrokerfið það mikið og dreifa því lengra út þá losnum við kannski einhvern tíma við bílinn?
Við höfum að minnsta kosti haldið okkur í formi síðan við fluttum. Við göngum heilmikið og hjólum. Það er gaman og við höfum kannað hverfið okkar ágætlega þannig. Vonandi höldum við því áfram og hvílum bílinn vel.
Sendi inn myndir af nýja félaganum við fyrsta tækifæri.

K.H.

Kallinn blogga

Ég datt aldeilis í lukkupottin í gær. Niðri í þvottahúsi er einskonar skiptimarkaður. Ég get t.d. sett föt sem eru orðin of lítil á börnin þarna inn svo einhver annar geti notað þau. Ég fékk t.d. fína skó á Björn Orra um daginn. Nema hvað í gær kíkti ég þarna inn og þá blasti við mér alger fjársjóður, þrjár VHS spólur með Helle Cristiansen líkamsræktarfrömuði og að auki fimm bækur eftir sama höfund. Spólurnar heita Godt form på 36 dager, Krop og sundhed og Styrketræning. Við skelltum okkur í spandexgallann í gærkvöldi og í stuttu máli sagt þá var orð ólíft inní íbúðinni þegar við vorum búin að horfa á allar spólurnar. Þetta var eins og að vera í sánaklefa en okkur leið miklu betur á eftir. Auður tók með sér bókina "Styrketræning på sengekanten" til að lesa í lestinni á leiðinni í vinnuna. Það sem við höfum verið að velta fyrir okkur er afhverju þessi fjársjóður var þarna. Ætli einhver hafi verið að uppfæra safnið á DVD eða kanski hefur manneskjan bara mist trúna á Helle og farið og fengið sér Jane Fonda safnið í staðin. Kanski varð hún leið á að vera alltaf ein heima að gera æfingar með Helle og ákvað að fara á stöðina til hennar. Hver ætli sé skýringin???. Þessi manneskja lítur örugglega hrikalega vel út.



Kv EK

Reglan að komast á

Ró er að færast yfir okkur og við að venjast nýju lífi. Börnin í skóla og leikskóla á morgnana og Eiríkur í skólann. Ég fer þrisvar í vinnuna og bara í 5 tíma í senn. Þannig að ég tel á mér hárin allan hinn tímann sem ég hef útaf fyrir mig hér. Ætlaði að ganga í íslenska kirkjukórinn en lítur út fyrir að hann sé að lognast út af. Ég fer að horfa í kringum mig eftir einhverju öðru að gera. Reyndar er stelpubolti á miðvikudögum með stelpunum á kollegíinu. Eiríkur er líka að reyna að feta sig í félagslífinu og gengur betur en mér eins og alltaf. Spilar stundum bolta og blaðrar við alla og þekki því alla, einhvern undraverðan hátt. Sigga er óheppin að engin íslensk jafnaldra hennar er hér en hún leikur mikið við stelpuna við hliðiná okkur sem er 4 ára, hana Andreu. Hún er með Birni á leikskólanum og tekur það mjög alvarlega að passa hann vel fyrir mig því þau leika víst mikið saman þar. Sigga sagði við mig um daginn að hún vildi eiga strákavin. Það er nóg af þeim hér. Veit þetta á gott?

Björn Orri í aðlögun á leikskólanum

Fyrsti dagurinn á leikskólanum gekk vel. Leikskólinn heitir Kærnehuset og er hérna á kollegíinu. Fyrst vorum við inni að leika, svo var börnunum safnað saman á dýnu og þau sungu nöfn allra á deildinni. Deildin hans heitir Sommerfuglerne. Eftir það fóru þau í leik saman að læra litina og að para saman hluti. Björn Orri hékk bara í fanginu á mér eða var að leika einn. Loks fengum við að fara út að leika og þá naut hann sín betur. Margir íslenskir krakkar eru á leikskólanum þannig að auðvelt er fyrir byrjendur að finna leikfélaga og tjá sig. Annars eru líka handalögmálin notuð í samskiptum þegar rifist er um dót. Björn Orri er mjög hrifinn af alls kyns stórum bílum og hjólum sem eru úti á lóðinni. Annars tók íslensk vinkona Siggu hann alveg að sér og þau gleymdu sér í leik. Ég lét mig bara hverfa inn í húsið á meðan. Leikvöllurinn er fullur af sandi og svo eru stígar til að hjóla eftir, stétt við húsið og smá gras. Einnig eru stór tré á lóðinni. Leiktæki eins og bílar eru teknir út úr skúr á morgnana og svo eru tvær rólur, rennibraut, hús og sandkassi, þetta klassíska. Ég sá að stóru drengirnir voru mjög uppteknir í framkvæmdum við að færa til trjágreinar sem höfðu dottið, fullar af laufi. Minni krakkarnir fundu kónguló og hún var fönguð í lítið plasthús og stóð þar á borði svo allir gætu skoðað. Miklar framkvæmdir eru líka við leikskólann núna og voru krakkarnir einnig að fylgjast með því. Verið er að gera við húsnæði og taka lóðina í gegn. Til dæmis fór einn leiðbeinandinn (karlmaður) út fyrir í niðurrif á skúr. Fastur liður hjá okkur Birni Orra þegar við komum við á leikskólalóðinni er að heilsa uppá hænsni sem eru laus fyrir utan girðingu. Haninn er sérstaklega fallegur, svona svarbrúnn og grænn eins og íslenskir hanar.
Á morgun ætlar Björn Orri að koma með mat með sér og borða á leikskólanum og ég skrepp frá þegar börnin fara út að leika, um 10, og kem aftur að sækja eftir mat um 11:45.
Nú förum við að sækja Siggu á eftir og förum svo niður í bæ að koma af okkur töskum sem þurfa að fara aftur til Íslands.
Biðjum að heilsa öllum,
Glaðsaxarnir.

Haust í Danmörku

Hér hefur snarkólnað. Íslenskt veður, ef svo má segja. Danir eru mjög óánægðir og segja jafnvel að veðurfarbreytingar í heiminum komi mest niður á þeim. Hvað með alla fellibylina, segi ég? Ekki eru þeir hér. Þannig að þeir sem eru á leiðinni hingað ættu því að hafa það í huga að klæða sig eftir íslenskum aðstæðum, hafið lobbuna með eða góða yfirhöfn.
Hvað um það, við erum ánægð og líður vel. Gott að vera ekki stanslaust svitnandi.
Björn Orri er búinn að heimsækja leikskólann tvisvar, svona foraðlögun. Hann nýtur sín mjög vel úti að leika í skólanum. Kennarinn hennar Siggu sagði líka að hún væri farin að tala svolítið við börnin. Hún er svo fljót að aðlagast. Hún er samt oft þreytt og vill helst leika við íslenska krakka til að hvíla sig á að reyna að skilja dönskuna.
Eiríkur er búinn að vera tvo daga í kynningarprógrammi í skólanum og fer aftur á morgun. Hann hefur verið fram á kvöld. Við Björn Orri höfum verið að slappa af heima og skoða hverfið okkar. Um daginn lentum við í fyrsta hjóladónanum. Ég gekk óvart í veg fyrir hjólreiðamann með kerruna og hann blótaði mér í sand og ösku. Held það útleggist nokkurn veginn svona á íslensku: gáðu hvert þú ferð helvítis kelling %####!"&$!!!... Hann stoppaði og var á götunni og ég bara gekk yfir götuna þar sem enginn bíll var og hann stoppaði. Ég lagði ekki í að rífast á móti og þagði bara og fór mína leið.
Við eigum von á góðum gestum um helgina. Unnur og Burkni koma með tonn af drasli sem við skildum eftir heima. Þau ætla að stoppa fram á mánudagskvöld. Hér eiga líka leið um Sigurjón og Arndís og Halla. Sem sagt Tivoli og verslunarferð ásamt kaffihúsum og fleiru skemmtilegu um helgina.
Súsanna, takk fyrir sokkana. Koma sér ótrúlega vel. Sigga hefur gaman að að velja nýja á hverjum degi.
Lovísa, fékkstu póstkortið?

Hilsen, Glaðsaxarnir.

Gleymdi einu mikilvægu

Við enduðum kvöldið þegar við komum heim með því að horfa á karatemynd með Erni og Evu sem komu að kíkja á slottið. Röbbuðum auðvitað heilmikið saman um hve gaman er að vera hér í Danmörku, hagstæð húsgagnakaup og fleira.

Kláruðum Frederiksberg með Guðmundi

Fórum í dýragarðinn í gær og skoðuðum öll dýrin. Hittum fiðrildi, einmana simpansa og íslenska hesta (voru feimnir). Við eyddum öllum eftirmiðdeginum þar og vorum fram á kvöld. Krakkarnir og ekki síður við fullorðna fólkið höfðum ofboðslega gaman að dýrunum. Á leiðinni heim ákváðum við að fá okkur eitthvað ódýrt og fljótlegt. Til að gera langa sögu stutta fengum við á borðið fjóra stærstu borgara sem ég hef séð. Tókum einn með heim og enginn hinna kláraðist. Enginn hefur lagt í hann enn.
Í dag ætlum við að skreppa niður í bæ eftir skólann hennar Siggu sem klárast klukkan 13:00. Í kvöld kveðjum við Guðmund sem fer til Ítalíu. Sjáum hann kannski um jólin næst.

Hilsen.

Laugardagsfærsla

Fjölskyldurólegheitardagur í dag. Vorum heima í rólegheitum. Eiríkur fór hjólandi með Siggu í stóra innkaupaferð inn í Herlev. Sigga hjólaði sjálf. Er orðin mjög örugg að hjóla. Þau keyptu allt mögulegt, meðal annars eitthvað gott til að bjóða Guðmundi uppá sem kemur í fyrramálið. Á meðan lékum við okkur, ég og Björn Orri og hann hjálpaði mér með þvottinn. Þegar þau feðgin komu úr innkaupaferð fórum við öll beint í strætó (og Metro) til Fredriksberg og fórum sem sagt í garð þar. Við gengum um garðinn og fengum okkur hressingu og fundum leiksvæði þar sem krakkarnir undu sér lengi vel. Lukum okkar vera þarna með bátsferð um garðinn sem var mjög skemmtileg. Gengum svo um hverfið í dággóða stund í leit að matsölustað sem hentugt væri að vera með börn og það tók svolítinn tíma. Kynntumst í leiðinni hverfinu ágætlega. Fundum svo eftir mikla leit ítalskan stað rétt áður en við gáfumst upp.
Í gær fórum við líka í hjólaferð eftir skólann til Herlev í leit að fótboltaskóm fyrir Eirík vegna fyrirhugaðs bjórbolta. Sigga hjólaði líka sjálf þá. Við keyptum líka leikfimiskó fyrir Siggu í leiðinni. Ég gekk framhjá fiskbúð og hugsaði með mér að mig langaði svo í fisk og gott væri að láta á reyna hvort fiskurinn væri góður. Var farin að sakna þess að fá fisk að borða. Fiskurinn var saltur, keypti löngu, og dýr. Kostaði 95 kr minnir mig, 500 gr. Hugsaði með mér, sem betur fer er Eiríkur ekki í mat. Vá, hvað fiskur er dýr. Ekki einu sinni ferskur. Hér er gott ef hann kemur 2 svar í viku. Ég eldaði þetta eftir minni bestu getu og börnunum fannst þetta gott. Björn Orri makaði matnum og henti útum allt undir lokin og sullaði niður á nýja dúkinn okkar. Svo nú eru komnir blettir eftir fyrstu notkunina. Börnin voru líka að fá kojur, ný rúm í gær og Björn Orri ákvað að hann vildi ekki sofa þarna. Hann lét öllum illum látum allt kvöldið þar til hann gafst um um 23 ca. Þannig að rólegheitakvöldið sem við Sigga höfðum planað saman fór fyrir bý. Ég var allt kvöldið að reyna að slappa af, elda í rólegheitum og borða í rólegheitum og að lokum að horfa á barnamynd með börnunum en allt snerist við. Ég var bara í því að róa strákinn niður og þrífa eftir hann. Sigga var mjög svekkt. Við fengum meira að segja eftirmat. Jarðarber með rjóma og sykri og niðurskorinn ananas. Börnunum þótti það gott. Við keyptum jarðarberin hjá grænmetis- og ávaxtasala sem spurði okkur hvort við værum frá Ísrael. Mér brá svo og hélt að hann myndi jafnvel neyta okkur um viðskipti vegna þess að hann væri sjálfur hugsanlega múslimskur Tyrki þannig að ég flýtti mér að leiðrétta það og hann afgreiddi okkur með bros á vör.
Við erum léleg að taka myndir en eigum samt myndir sem við eigum eftir að setja á netið. Reyni að bæta úr því þegar brósi fer. Bið að heilsa í bili.

Komin heim og í gírinn

Við erum komin af stað aftur í stórborgarlífinu hér í Köben. Sigga fór í skólann og líður betur. Á morgun fer hún í smáferð með skólanum í mosen, sem ég held að sé mýrin. Ég fór í vinnuna og hélt að ég væri bara að fara að tala við launafulltrúann en ég byrjaði aðeins að vinna og kynntist fullt af skemmtilegu fólki. Við gerðum skrifstofuleikfimi og ég borðaði með hópnum í mötuneytinu sem er ágætt. Í vinnuna byrjaði ég að hjóla í lest, fór svo í Metro og hjólaði svo. Ég vinn úti á Íslandsbryggju, Njálsgötu. Í vinnunni var kona sem sat næst mér og hjálpaði mér mikið við að læra hvernig ég á að vinna. Hún talaði sem betur fer enga íslensku eins og margir aðrir í vinnunni svo ég gat æft mig svolítið. Eftir vinnu fórum við fjölskyldan öll saman í innkaupaferð hjólandi inn í Herlev bymidte. Sigga er orðin óskaplega dugleg að hjóla og hún hjólaði sjálf. Við fylltum vagninn af mat, börnin sofnuðu í búðinni, en vöknuðu fyrir heimferð. Við höfum ekki enn haft tíma til að fara að sækja stækkunarplötur á borðið okkar en sú ferð er áætluð á morgun. Við erum enn að leggja lokahönd á að koma okkur fyrir en flest er komið. Við eigum eftir að semja við símafyrirtæki, fá kojur fyrir börnin, sækja um skattkort sem dæmi. Allt þetta er samt á dagskrá í þessari viku ásamt því að vera að vinna fyrir hádegi fram á fimmtudag. Vinn svo ekkert í næstu viku því þá er Eiríkur í kynningarviku í skólanum. Vikuna eftir það er Björn Orri að byrja í aðlögun á leikskólanum sem gengur vonandi vel. Leikskólarnir eru mjög frjálslegir hér. Barnið er með pláss allan daginn og það getur komið og farið þegar foreldrum hentar. Fyrir minnstu börnin er æskilegt að sé einhver áætlun. Þau koma með nesti á leikskólann en fá ekki heitan mat. Jæja, verð að koma börnunum í háttinn. Bið að heilsa.

Af Jótlendingum

Erum hér í algjöru letilífi. Fórum í smáökuferð að strandbæ í dag. Þar var hátíð, staðsett við höfnina. Fiskbúð opin og menn sem voru í keppni um að sitja eða standa sem lengst á staur, eins vitlaust og það nú er. Í boði voru reyndar peningaverðlaun sem ég man ekki hvað voru há. Ýmislegt til dundurs sem sagt. Sigga og Áróra eru oftast bestu vinkonur í heimi og njóta þess að vera saman. Hér búa tveir kettlingar sem þurfa að ganga í gegnum ýmislegt með þeim. Í morgun lennti annar kötturinn í slysi sem var samt ekki hægt að rekja til þeirra á neinn hátt. Hann festi sig í flugnagildru og kom hlaupandi, emjandi með fimmta fótinn. Björgunaraðgerðir tókust vel.
Afmæliskveðjur til nöfnu minnar og átti ekki líka Svana afmæli í gær? Bið líka að heilsa þér! Er ég að gleyma einhverjum? Hej, hej. God natt.

Hvað segir Ísland gott?

Þið eruð mjög þöglir lesendur ef það eru einhverjir. Fjóla er þó dugleg að láta vita af sér. Takk fyrir það. Í gær átti Sigga erfitt. Hún var mállaus heilan dag. Enginn vildi leika við hana. Henni fannst gaman inni í kennslustundum en erfitt í frímínútum. Hún ætlaði ekki að vilja fara í morgun. Ég herti hana upp og hún fór glöð af stað. Lofaði að sækja hana sérstaklega snemma vegna þess að við erum á leið í ferðalag í dag. Við erum á leiðinni til Jótlands. Ætlum að kíkja í Lególand. Gleðifréttir eru að Björn Orri er kominn inn á leikskóla frá 1. 9., byrjar þá í aðlögun. Ég er búin að heimsækja vinnuna og líkar vel. Mamma, pabbi, Guðmundur, Unnur OG BURKNI hafið það gott í veiðiferðinni. Öfunda ykkur rosalega. Biðjum öll kærlega að heilsa öllum hinum.

Fyrsti skóladagurinn

Í dag byrjaði Sigga í skólanum. Hún var mjög spennt og kvíðin. Hún fékk heimþrárkast í gærkveldi sem ég held að hafi verið bland af kvíða fyrir skólabyrjun og heimþrá. En þetta fór alltsaman vel. Við gengum af stað klukkan 8:30 með færeysku vinum okkar, Elinu, Önnu Maríu og ónefndum 2ja mánaða dreng. Dönsk stúlka bættist svo líka í hópinn, Sahba. Hún er með Siggu í bekk. Við fórum fyrst inn í íþróttasalinn þar sem var búið að koma fyrir borðum og stólum. Allir settust niður, börn og fullorðnir. Skólastjórinn bauð okkur velkomin og hélt heljarlanga ræðu sem ég skyldi bara brot úr. 2. bekkur kom og söng lag og gaf öllum í börnehaveklasse danskan fána. Fleiri stigu upp í púltið og skólastjórinn sagði meira. Loks var komið að því að Sigga var kölluð upp af kennaranum sínum, Lene. Hún er í 0.A. Sem ég hélt fyrst að væri E og skyldi ekki afhverju hinir væru B og C. Hún stóð sig vel og gekk inn í stofuna ein með krökkunum og pabbi fylgdi á eftir með skólastofuna og skyldi mömmu og Björn Orra eftir til að hlusta á fleiri upplýsingar og fá kaffi og danskt sætabrauð. Björn Orri var mjög rólegur og góður. Að lokum fórum við foreldrarnir inn í bekkinn að sjá hvernig þau hefðu það og hlusta á meiri upplýsingar frá kennaranum. Sigga sat þar við borð með íslenskum dreng, Sæþóri. Hann hefur verið í Danmörku í rúm 2 ár og getur hjálpað Siggu ef hún skilur ekki. Þau höfðu öll fengið epli og verkefnabækur ásamt pósti til okkar foreldra. Dorit fór svo með okkur niður í SFO eða fritidshjemmet (svona staður í skólanum sem krakkarnir eru á eftir skóla, man ekki hvað heitir á Íslandi). Hún gekk með okkur um allt og sýndi okkur allt sem þau gera þarna. Mjög þægilegt umhverfi, eins og leikskóli með allt til staðar, meira að segja smíðaverkstæði. Sigga kemur til með að byrja 8:15 í skólanum og er æskilegt að hún sé mætt um 8:05 og getur mætt kl. 7 og fengið morgunmat í SFO og er fylgt upp í skólann þegar hann byrjar. Þegar við vorum búin að skoða SFO og tala heillengi við SFOstjórann og hana Dorit og fá ennfleiri upplýsingar fékk Sigga að leika sér í smástund með Elínu og Sahba. Eftir það fórum við heim að borða því Sigga var orðin svöng. Nú eru börnin að leika sér með legó saman. Eiríkur er farinn í skólann sinn. Ætlaði að skila inn mynd og skrá sig í eitthvað og skoða hvar hann á að mæta o.s.frv. Farvel.

Bankaferð til Herlev

Við fórum að reyna að stofna reikning. Fyrst fórum við í Jyske bank og þeir vildu ekki taka við okkur vegna þess að við vorum ekki með eitthvað kort sem skipti í raun engu máli vegna þess að við erum með danskar kennitölur og staðfestingu á því frá kommúnunni. Svo röltum við áfram og fundum góðan kjarna með mörgum búðum sem okkur leyst ágætlega á. Margar með góðum tilboðum. Eftir smárölt og kústskaftfund vorum við á heimleið en rákumst á Danske bank og viti menn þeir vildu taka við okkur.

Framundan

Við erum á leiðinni í banka að stofna reikning. Á morgun byrjar Sigga svo í skólanum. Hún er mjög spennt. Við ætlum að kíkja í fleiri búðir og skoða bestu tilboðin. Okkur vantar enn ýmislegt praktíkst, eins og kústskaft. Ég ætla líka að heimsækja vinnuna mína á fimmtudaginn. Á föstudaginn ætlum við svo að fara til Jótlands að heimsækja Steinunni, Hall og Áróru.

Kveðja,
Glað-Saxarnir.

Strandferð

Í dag fórum við á ströndina á Amager. Hitinn hefur hækkað meir og meir eftir að við komum og í dag fór hann upp í 30° C. Góður dagur fyrir ströndina. Björn Orri naut þess að baða sig. Sigga var mjög upptekin við sandkastalaiðju. Á morgun er spáð þrumuveðri og vitum ekki hvað við eigum að gera. Kemur í ljós. Set inn fleiri myndir á myndasíðuna: http://picasaweb.google.com/audurbj. Bið að heilsa í bili.

Komin til Danmerkur og í samband við netið

Hej,

af okkur er allt gott að frétta.

Við erum búin að sækja um danska kennitölu og huga að ýmsum praktískum atriðum. Einnig erum við búin að vera um allt hverfið að reyna að finna húsgögn í litlu íbúðina okkar og enduðum á því að leigja sendibíl og þræða búðirnar. Hér er heitt og verð að segja að ekki hafi verið þægilegt að vera með börn í þessum leiðangri og hvað þá í strætó og á göngu. Þess vegna var kærkomin heimsókn tveimur dögum eftir komu okkar þegar mamma og pabbi komu.
Hér á kollegíinu eru margir Íslendingar og langalgengasta tungumál barna hér er íslenska. Því ætti ekki að koma á óvart að Sigga hefur þegar þefað uppi nokkra íslenska krakka. Fyrsta daginn mættum við hér með allan okkar farangur lyklalaus og Íslendingarnir sem geymdu lyklana fyrir okkur voru ekki enn komin heim. Færeyskur nágranni okkar bauð okkur velkomin inn af götunni og Björn Orri fékk að sofa í sófanum í stað þess að liggja í grasinu og við fengum kaffi og nokkur góð ráð í löngu spjalli. Okkur gekk ágætlega að spjalla saman á færeyskdönskíslensku. Reyndar á hún 6 ára dóttur sem er jafngömul Siggu og hún skilur svolitla íslensku vegna þess að hún var með svo mörgum íslenskum börnum á leikskóla. Þeim gengur ágætlega að leika saman. Hér var sumarið að koma og heitasti dagurinn í dag um 27 ° C með háu rakastigi og allir hafa verið að fagna því með sundi í görðum og strandaferðum og á alla vegu sem við Íslendingar kunna að gera til að sleikja sólina. Kemur sér vel að það rigni ekki því við höfum ekki enn fundið borð sem hentar hingað inn og því höfum við borðað úti í garði.

Dægradvöl:Við erum með 39 sjónvarpsstöðvar á kapal. Taka upp úr kössum, raða í skápa, setja saman húsgögn, hengja upp ljós, drekka Harboe eða rauðvín og hygge sig.

Við höfum verið svo mikið að koma okkur fyrir að við höfum ekki gert mikið annað en við náðum samt að fara í Dyrehavsbakken um daginn. Krakkarnir kunnu mjög vel við það. Við tókum strætó og fórum aðeins of snemma út og fengum góðan göngutúr í staðinn og skoðuðum hluta af DTUsvæðinu sem er mjög stórt. Gengum svo í gegnum huggulegt sveitahverfi fyrir utan skóginn og í gegn um skóginn og fengum okkur nesti undir tré. Svo tóku lætin við í skemmtigarðinum. Sigga fór með okkur í rússibanann. Björn Orri var mjög æstur að fara í tæki líka.

Praktískar upplýsingar: Flestir krakkarnir eru í fritidshjemme á daginn eða á leikskólanum og foreldrarnir að vinna. Við erum í fríi. Þvottahúsið er rétt fyrir neðan okkur og því auðvelt að sinna því en mikið er það dýrt. Hér er 10-15 mín gangur í Netto og 15 mín hjólaferð í Kvickly. Við þekkjum ekki umhverfið betur ennþá.

Félagsskapur: Við fórum á verslunarmannahelgargleði á laugardaginn og hittum marga Íslendinga þar. Íslendingar búa hér við hliðina og þau hafa reynst okkur vel. Við hittum óvænt Helga frænda Magnúsar hér fyrir utan og hans fjölskyldu. Þau eru í heimsókn hjá vinum en þau bjuggu hér fyrir nokkru.

Hej, hej.

Heyrumst seinna. Kannski koma bara myndir bráðlega líka.

Kveðjustund

Okkur langar að hitta sem flesta áður en við förum af landinu og ætlum því að vera á Kaffi Mílanó kl. 20-22 annað kvöld, þriðjud.

Vonandi sjáumst við sem flest en annars sjáumst við bara seinna.

Þið getið líka fylgst með hérna:

www.audrikur.blogspot.com og www.picasaweb.google.com/audurbj


Kærlig hilsen,
Auður og Eiríkur.

Hér ætlum við að flytja ykkur fréttir úr Danaveldi

Við flytjum bráðlega og hér getið þið fylgst með okkur. Lofa ekki miklum skrifum en reyni að gera merkisatburðum í okkar lífi góð skil.